《你佬味！》

（留意番左上角search嘅keyword）

之前在《誌・在尋覓》提過，寫（打）網誌無非渴望對著茫茫網海呼聲吶喊，然後能夠聽到半點回音鑽入心扉。除此之外，我亦會特意將網誌與某些知己好友分享，期望他們更了解自己的思、想、行，若能收到一兩個關注或回應便滾動滿足。

某天某時某刻，米門忽然痕癢起來，於是厚住幾尺面皮主動向位好友索取對網誌的評語。誰知道得來嘅回應竟然是：「佬味好重！」（其實仲有其他唔錯評語嘅）。我個腦立即爆出三個字：「我的媽！」（唔係鬧個朋友呀，唔好誤會，只係情緒上嘅宣洩）。有時俾朋友同事評論自己成個「佬」咁樣樣都算啦，而家連D字都話成陣「佬水味」，莫非我真係咁「佬味」？唔通我呢世都擺脫唔到呢個「佬味」？

正當我萬念俱灰諗緊點樣終「佬」之際，我停左落黎，諗一諗⋯⋯再諗多一諗，究竟咩野叫「佬味」？係邊個去定義「佬味」？對於咁有求知慾嘅我嚟講，當然上網Google一下啦。

唔search廚由自可，一search廚就見到咸爺⋯青雲⋯彥祖⋯城城⋯三哥⋯金勝（唐文龍）⋯漁民樂⋯阿步寬⋯⋯嘩！乜料？（雙眼對住個芒放光，成地口水）全部都係型男索佬嚟㗎喎！原來「佬味」嘅真正意思係咁樣樣，我（地）一直誤解左（雙腳已離地半尺），我同佢地係並價齊驅（再離地半尺）！「佬味」察實係好野嚟。

我對「佬味」立即有全新嘅理解同定義，所以大家（同埋我）唔好再誤解呢個「佬」字號。記住，下次有人同你（我）講：「你佬味！⋯⋯⋯⋯⋯⋯好濃呀！」。其實係讚緊你（我）似咸爺呀，知道冇。

《臨老入書叢》

不論你係六十、七十、八十、九十後，相信都聽過「書中自有黃金屋......書中自有顏如玉......」呢句經典又經典既古詩。就係叫你睇多兩本書，將來就可以有磗有地有車兼有女，聽落都覺得爽丫丫呢。

鬼唔知阿媽係女人，但我就係無興(音：輕)有乜計。一打開本書，D書香(或臭)就好似毒霧咁，令你神魂顛倒，欲罷不能，猶如周公睡魔樹懶三缺一拉住你攻打四方城，打足廿四圈。

雖說對閱讀沒有興趣，還是看過三兩本書仔。可是歲月如斯，步入中年，越覺思維狹隘、思考局限、意念淺平（其實長久都係），而自己不甘於此（終老），渴望（蓋棺前）能踏前半步步距、多添半點墨水、開闊半度視野、增厚半分內涵。於是自定一月一書的計劃。

唔睇由自可，一睇就停唔到。幸運地遇上幾位好作家，被他們的文筆吸引，閱讀興趣真的給發出芽來，且茁壯成長。又如同在霧霾中撥開一線光，被其銳眼的光芒吸引著。相片是近大半年所閱讀的書藉，有輕短散文、實用工具、個案分享。每個作者風格各異，書本訊息各有不同，有智慧滿溢、有觸動心扉、有思維啟發，都是愛不釋手的，很享受在字叢中來回穿梭。

雖然遲係遲左少少，但仍慶幸這個塵封吋厚的引擎終被啟動，滾滾向前。當然速度遠不及某位唔L掂局長月看三十本書啦，抵你做唔L到局長。唯有繼續响書叢裡面慢慢躝下躝下，不過十分享受。

《勸學詩》

富家不用買良田，書中自己千鍾栗。

安居不用架高堂，書中自有黃金屋。

娶妻莫愁無良媒，書中自有顏如玉。

出門莫愁無人隨，書中車馬多如簇。

男兒欲逐平生志，六經勤向窗前讀。

~宋真宗~

《誌・在尋覓》

http://blog.cie.org.uk/wp-content/uploads/Blog-image_2.jpg

曾幾何時，網上充斥著不同類型的網誌如：Xanga、Yahoo BLOG、Blogger、無名小站、Mysinablog等，供人們發表個人情感想法愚見偉論。我亦是其中一份兒，登記了一個部落格，分享自己的生活粹事、愚民愚見、人生感悟、電影後感⋯⋯

不過自從Yahoo BLOG關閉後，我亦隨之「封筆」，沒有再發表任何愚論。可近來不知那裡來的思潮（其實就是身痕，準確點說是身體某處特別痕）想寫點東東，於是請教朋友時下還有甚麼網誌的設定較為理想可選擇。朋友的回應是現在寫網誌已不合時宜，何不貼在Facebook就是了。我解釋道由於Facebook的設定使觀者飛快地閱讀大量不同類別的資訊，沒有空間讓他們緩緩地咀嚼一字一句，故不適宜作文章分享，這是我的狹隘愚見（戴返個頭盔先）。

無可否認，在網上發表愚論，多少希望能夠與別人產生共鳴共振共通，猶如站在茫茫大海前呼聲吶喊，期待回響湧回自己的耳蝸心扉給鼓動振盪。而更重要的，是讓我能夠在自由自在無拘無束無框無架地表達我思我想我感。最終幾經考慮下選擇了Blogger這個平台，盡情盡性地發嗡風發牢騷發花癲發遠夢。

p.s.這本該在此網誌建立時貼出來的第一篇文章

《該死真係唔好L病》

http://www.complianceposter.com/blog/wp-content/uploads/2016/03/sick-worker-300x225.png

某個晚上忽然病到面紅耳綠，第二朝頂硬上返工，點知半路都係撐唔住，唯有臨時搵同事補位。為同事帶黎諸多不便，已經深感萬分歉疚，十萬個唔好意思。病到死死下，都只可以訓、食藥同訓、食藥、同再訓。病假完左第二日拖住半條命返到公司再同同事Sa多次冧。

而當你仲係處於半死狀態，竟然响微細管道聽到原來你腦細好覺得，你放假個陣就甩醒馬騮，偏偏返工就先黎病（有冇試過俾人咁諗或且諗過人？）。個下就算死左入棺材，都嬲到即刻彈返起身，就算周圍環境濕度有200%都撻得著火！

個下又天真又傻嘅主人翁先醒覺，原來病...係一種原罪。

「邊L個叫你放假時咁L HIHI！」

「邊L個叫你咁L散仔學人病！」

「邊L個叫你唔L係愛將抵L死！」

「邊L個叫你做細就係俾人吊9！」

「邊L個叫你生存响香港响地球！」

「邊L個叫你⋯⋯」

（心裡面無限Loop）

响社交網站公開放假時既歡樂照片，竟然成為請病假俾人說三道四嘅話柄，其邏輯何等荒謬！當然，家下响香港响呢個世界，更荒謬嘅事每日都發生ing⋯⋯

跟住實有班賢達會講：

「好地地人地做乜會咁諗你先？」（一定係我問題囉）

「係咪你平時做得衰俾人印象差呀？」（一定係我問題囉）

「有無諗下點解？」（一定係我問題囉）
「好好做好自己啦。」（即係練好D身子唔好病？）

「⋯⋯」（唔L諗到啦！）

呢條粉餅更加明白，過往點解有D同事總係唔會俾私人FB，要將工作同私人空間完全割裂，返工就返工，放工唔收Call，你理我Do What。面對呢個邏輯混沌嘅工作領域，唯有自嘲，中年男，你仲係太年輕。

死，都唔該死遠少少。

《唔用套得唔得呀》

夏天除左為大地帶黎雨水，仲帶黎極多嘅即棄遮套。唔記得由幾時開始，每逢落雨天，各大小商場寫字樓建築物門外，總會擺放大量即棄遮套，以便市民內進時能將遮套上，唔駛成地水，不過咁樣就製造好多即棄物品。

當我見到呢個畫面，不禁令我一問，究竟呢d安全袋為咗方便邊個？

A) 方便商場阿姐可以抖下氣，唔駛密密拖地咁辛苦。

B) 方便阿婆唔驚行路跣親。

C) 方便商場負責人管理商場同免責。

D) 以上皆是

無論咩原因，其實呢d種種嘅方便，又令自己身處嘅地球帶黎幾多不便？唔知點解，家下嘅商場地板，好似唔可以同水做朋友，一濕水就隨時跣到你攤攤腰。屋企樓下個商場設置咗一個雨傘除水機。

其實呢個設計十分之好，不過極少人使用（包括我自己），可能我地都未習慣未適應未乜乜。不過面對全球暖化、天災連連、生態失衡，呢d都唔再係理由！嘗試調節自己嘅生活習慣，善用呢d嘅有創意，又環保嘅產品，為地球出半分力。

人雖渺小，不過好多嘅渺小加起黎，可以有好大嘅力量帶來轉變，反之亦然。唔用套，其實都可以好安全。

https://www.facebook.com/greenpeace.china/photos/a.311164940500.332979.13716140500/10156969800435501/?type=3&theater

「地球最大的威脅，就是你相信別人會去拯救她」

《C9情懷》

月頭响某餐廳扮文青睇緊書嘆緊咖啡個陣，忽然有班著到青BB嘅C9衝入黎，坐响我隔離張枱到啊吱啊咗。我先醒起，係喎！又到《一田購物優惠日》喎！佢地一坐低就好快手，你叫餐，佢斟水，然後就好安心咁坐响到休下息，吹下水。

佢地攰到好似俾人打咗一身咁，其中一個仲趴响張枱到中場休息，好明顯優惠日一定好墟冚。雖然佢地好攰咁，不過响佢地嘅表情同埋講嘅野，我只係感受到笑容同歡樂，實在有趣。

由於班C9太嘈，打擾曬我嘅雅興，我就扮睇書，豎起隻耳仔聽下你地嗡乜咁高興

「你地有冇見到莊生呀？」

「有冇同佢影相？」

「(好少女feel)有呀~」

「係啦，佢專登返嚟探我地，同我地影相~」

「唉喲，頭先好忙無時間，一陣返去搵佢影返先~」

(節錄)

你能夠想像C9嘅外表(實際上都真係C9)，少女嘅內心個種矛盾畫面係點樣？霧汗。我杯熱啡都變左做凍啡囉，唔該。無計，莊生你嘅引力真係超強，唔單止吸引男女老少，連C9都可以逆齡變做少女，真係無得輸。(細細聲)查實小編都係你嘅小粉絲嚟㗎，害羞。

當我仲慢慢嘆緊杯咖啡繼續扮文青，班C9已經食完起身埋單，再次帶住歡笑上「戰場」「殺敵」。雖然係遲左少少，不過都想將文貼出黎歌頌呢位男神，閃閃眼。

(攝於4月莊偉忠齋問齋答座談會)

《一人．一點一滴．一地球》

http://www.alexhoffordphotography.com/node/2292

星期日帶著一群青少年參與由 世界自然(香港)基金會主辦的「世界環境日海岸清潔活動」的義務工作，到大嶼山水口海岸邊清理垃圾。除了在海岸邊執拾垃圾，過程中亦需要將垃圾分類統計，以作分析及化成數據，再交給相關政府部門或團體，商議對策改善環境生態。

身處在熱焗的岸邊，短短的兩小時服務，要不斷彎著腰將垃圾拾起，頗為吃力。執拾垃圾時我稀奇垃圾何以從海上衝到岸邊，是被人亂拋在這裡？被人丟棄在海上再衝到這裡？無論任何原因，必定是人為所致。

天氣反常、氣溫上升、天災繁生，其實都與我們息息相關，關我咩事喎？當我發現垃圾中不少是日常生活的物品，如零食包裝膠袋、膠樽蓋等大量膠製物品。這讓我反思在現代化的都市運作模式，究竟令地球帶來多少負擔？我們用兩小時所謂清理岸邊的垃圾，地球又需要多少年才能正式將它們消化呢？

從生活習慣及細節上著手，嘗試調節生活習慣，減少不必要的浪費及做好垃圾回收分類。一個人的力量確實十分微小，但若然很多的一個人，很多的一點一滴所加起來的力量卻大得很，定能為我們身處的這一地球帶來轉變。

p.s.

紙包飲品盒可回收！變成能源勿浪費！－新假期－GO GREEN
http://www.weekendhk.com/go-green/%E7%B4%99%E5%8C%85%E9%A3%B2%E5%93%81%E7%9B%92-%E5%9B%9E%E6%94%B6-%E8%83%BD%E6%BA%90-%E7%92%B0%E4%BF%9D/

《腿張開・奶野》

到泰國旅遊除左好多時同陽光玩遊戲，骨場（我緊係講緊正經個d啦）亦係唔少旅客既朝聖之地，而我都唔例外去見識見識。

講到去骨場，必然要引述杜汶澤先生在電影《無間道》中飾演傻強時與陳永仁(梁朝偉演)嘅一段對白：「你知啦，揼骨條女唔正嘅話，好奶野架ma。」。而我就帶住一個膽顫心驚嘅心情，步步為營咁踏上陰深的梯級及長廊，响房間寬衣等待一個會否奶野既相遇。

當房間嘅敞門拉開，有三位按摩師行入黎，其中一位經我目測肯肯定超過我兩倍體重，而我亦好幸運咁被呢位魔人布歐（下稱：魔人）身形般嘅按摩師選中，當刻我只可以講：「呢舖堅係奶野啦⋯⋯」。當魔人行近我既床邊坐低，而敞响床墊上嘅我，望住魔人伸手將我條腿拉開，預備施展佢嘅渾身解數時，我完全體會到响一個陌生人面前腿張開嘅羞愧、軟弱及無助。我即時諗起某則新聞，印度某某局長曾經講過：「既然阻不了『強暴』，那就享受吧。」。於是，我閉上雙目、含著怨淚、抓緊床角、咬緊牙關，希望盡快「完事」。

魔人開始侵佔我嘅肉身，佢响我每寸肌膚按壓時，我已分唔清究竟被接觸嘅，係佢嘅脂肪定係肌肉，我唔敢諗亦唔想去諗，驚驚。要知道，泰式按摩有一招會按壓大腿內側動脈位置，我嘗試用強烈嘅理智意圖將神經系統與大腦斷絕聯繫。結果好明顯係失敗，於是我繼續接受精神同肉體嘅折磨。

經過一輪激烈嘅「攻勢」，魔人叫我轉身趴响床墊上，預備另一輪「攻勢」，我本來以為可以稍竭半刻，點知就俾彗星殞落般嘅巨臀壓在腰間，猶如被如來佛祖壓在五指山下嘅馬騮仔動彈不得，我感覺上半身同下半身好似要分離，哭。最後魔人以一招雙腳撐背，結束左7200秒嘅煎熬。而我，就倒臥响床墊上吸著半口空氣續命。所以話，若果揼骨條女唔正，真係好奶野，囧。

《手信・用》

根據非正式統計，無論出外旅遊參觀甚麼景點，十居其九點九的旅客，總有一個景點叫—買手信。

在現今全球化下的地球村，查實有甚麼各大熱門手信是香港買不到呢（要講當然仲係有），何須每次都充當水貨阿姑，拖著大包細箱的，成個蝗族咁樣樣，咪又係來來去去買吃的買飾物的買唔等駛的，最後搬到死下死唔知為乜⋯⋯

當對住已裝滿個人衫褲鞋襪既喼（我承認可能有太多不必要既無謂野），尤其帶埋家中既小魔怪外遊時更甚，已經無多餘空間放置手信。呢個時候不禁令我帶點怨氣地長嘆—究竟邊L個發明手信呢樣野？

其實手信貴乎一點心意，與「知」分享，遇到一些合宜的希望送贈知己好友，若遇不上亦無礙，而唔係為左滿足他人，其實更多係擔心遭人話柄。

就係咁，雖然我認為旅行係無必要買手信，不過面對世俗人（主要係同事）既眼光，因為見同事仲多過屋企人，好多時又會合作，所以我軟弱我無力我無膽量實踐呢個信念，唯有向現實低頭。最後還是買下大一堆吃的飾物的唔等駛的，送給俾家人還要親的同事⋯⋯