《廁室逃脫》

https://lifeafterhavingalife.files.wordpress.com/2011/01/toilet.jpg

某日同阿女逛商場途中，佢忽然話要去洗手間，當刻好似帶住個「計時炸彈」，唔知幾時爆，為咗盡快「拆彈」，所以決定選擇最近但人流暢旺嘅廁所，亦無可奈何要响男廁幫阿女處理，廁所嘅衛生狀況可想而知。

儘管有晒心理準備，不過身處個幾平方尺嘅空間仍然令人提心吊膽。為咗令阿女遠離廁板，於是我紮行馬抱起佢希望佢盡快攪掂，點知阿女話要辦大事，囧。我都明白被抱住嘅感覺唔多舒服，令阿女難以將「事」辦妥，我個手瓜亦都捱唔到幾耐，所以唯有硬住頭皮將佢放响廁板上，千叮萬囑隻手唔好掂任何地方。

响廁格充滿上萬過億肉眼睇唔到嘅細菌，可謂半刻如年，內心個種擔憂恐懼驚惶失措，驚死佢左掂又摸，眉頭不自覺咁皺起嚟，忽然阿女同我講：「爸爸唔好皺眉。」，個下真係令屏息緊迫嘅空間帶嚟半點舒緩，不過個心仍然處於戒備狀態。

眼見阿女全神貫注咁「辦事」，我又心急如焚地問：「得唔得呀？出黎未呀？」，到見到舊「金」鑽出黎個下，真係開心到笑咗出嚟，好似接生咁樣樣，哈。到阿女真係「辦完事」之後，我又再鬆半啖氣，但喺處理「手尾」個陣，仲係好驚佢觸發周圍嘅細菌警號，所以唔敢鬆懈。

最後終於可以抱住阿女响斗室逃脫出嚟，即刻吸返啖舒適空氣。