《造作家》

https://weliveleaf.files.wordpress.com/2015/08/xnegativespace-141-1300x867-pagespeed-ic-uwnyqazu-8.jpg?w=920&h=666&crop=1

造，就係由無到有，由零到多於零，將本來唔存在嘅野由你「作」出黎。我本身嘅諗野(思考)模式就無乜組織、無乜結構、無乜連貫、無乜章法，簡單d黎講就係打晒風亂咁黎，之但係個人又衰衰格格，想作出黎嘅野令自己通人地明，就真係要花十牛八虎之力先可以完成。(點解係十牛八虎唔係九牛二虎，咪就係極難咁囉)。

作，在我而言，不論係飽學詩書，抑或只識得幾個字，不論內容係合情合理，定係狗屁不通。其實退一萬零一步，只要你有野想講想表達，就可以成為一名「作家」。至於是高手低手，是名筆市井，則由大家各自修行各自精彩，與人無尤。

家，要成派成家，需要不斷反覆思考整頓，方能建立屬於自己嘅思維模式。我嘅靈感就好似患左「無定向喪心病狂間歇性全身機能失調症」(簡單d黎講即係「腦震盪」)，好多時「腦震盪」會忽然之間震一震，有少少似企响尿兜前腿張開個一刻(我亂嗡嘅)。每次「腦震盪」個陣，我都自以為靈感精彩絕倫、驚世巨作，只有我呢個天才先有咁嘅思維、眼光、見識諗到，但呢個勁過核爆嘅靈感亦會好似煙花咁一瞬即逝，如果唔立即提筆(解鎖)記低，通常9成沖出大海搵唔返，得返1成碎片，更多時候係「斷片」，想搵(記)都搵(記)唔返。

真係落筆啦(將手指頭輕放於𨫡盤上)，然後天真咁希望將個1成碎片併返成張完整圖畫出黎，真係極其困難。點做到，就係做唔到，所以我好多時都會開咗個頭，儲一個，又開另一個頭，又儲一個，於是又知又覺間儲左好多個草稿，仲多過發佈咗個d。如果我生存係原稿紙年代，相信响我張工作枱底下個廁紙鑼會放滿(瀉)一舊又一舊嘅紙球，恐怕我晚晚都會同樹妖大被同眠。雖然係咁，我仍努力嘗試打返開一個又一個紙球，希望將每個曾經响個腦震一震過嘅靈感，都能夠被重整然後還原它的面貌，呈現人前。

又作左一篇。