《有種態度叫澳牛》

去澳牛食嘢，係食一種態度。

自言非澳牛嘅粉絲擁躉，亦唔記得上次食澳牛係幾時，當時嘅「體驗」都印象模糊，唔知大家又有過咩「體驗」？俾人屌住咁食，凳都未坐熱就俾人「趕走」，但好犯賤咁會再返去俾錢人地屌自己。今日途經呢到，膽粗粗行入「木人巷」，更推動我執起閒置良久嘅筆（鍵盤），動起來打這篇文章。

可能陸客少咗嘅緣故，門口條隊好短，唔駛1分鐘就可入座。咁坐低就咋咋淋諗食咩啦（去過就明），但我望著遠柱上三個餐牌（特餐/茶餐/早餐）好似思考人生咁，究竟呢三個有幾大分別，導致價錢唔一同？與此同時，有個白色身影物體—待應，企响我隔離，一手平放响眼眉位置嘅姿勢，望向我望緊嘅方向，佢應該心諗（諗L完未呀？）响待應嘅「催促」之下，我都乖乖咁落決定，要咗份特餐。

响半點空閒嘅時分裡，我目測有二十位待應，以約一比二嘅比例好積極咁「招呼」客人，仲未計廚房水吧收銀。以咁嘅舖位，咁嘅人手比例，待應自然可以好貼身咁招呼啲客，快快「倒」晒啲嘢入口，然後俾錢走人是常識吧。

咁話晒都係一間食店，食物質素當然係首要考慮啦，份特餐有火腿炒蛋厚多士+叉燒通+茶走，火腿沒什麼好講，而炒蛋濃滑，厚多士塗上薄薄的牛油，剛剛好。無諗過叉燒通嘅叉燒香亦肉嫩，湯底應是穩陣的金寶雞湯。「茶走」少甜則茶香奶滑，好飲。將簡單的事做好，其實一啲都唔簡單。不過又未必好困難，只要重複做一百、一千、一萬次就可以。

有時效率嘅野真係1+1大過2，客食得快，待應清枱更快，見你食完一碟，佢就立即收走，彷彿大大深呼吸多半秒都有莫大罪疚感，我仲膽敢影相覆訊息，簡直係罪無可恕（求心理壓力面積）。

總結今日嘅「體驗」，其實頗欣賞待應快狠準的服務，因為他們對自己工作的熟知程度，猶如反射神經植入血中，而他們今日亦算友善，整體都算正面。12:24踏入澳牛，12:44俾錢離開。能夠單拖响澳牛逗留二十分鐘之久，係一種福氣。